.jpg)
అమరావతి, ఆగస్టు 13 (ప్రతి ఉదయం ప్రతినిధి): రాజధాని లేని రాష్ట్రంగా ఆంధ్రప్రదేశ్ అవతరించిందని, రాష్ట్రానికి ఆర్థిక రాజధానిని నిర్మించాలన్నదే సీఎం చంద్రబాబు నాయుడు లక్ష్యమని మంత్రి నారాయణ తెలిపారు. గురువారం అమరావతిలో సీడ్ యాక్సెస్ రోడ్ రెండో దశతో పాటు బకింగ్హామ్ కెనాల్పై నిర్మించిన స్టీల్ బ్రిడ్జిని సీఎం చంద్రబాబు ప్రారంభించారు. ఈ సందర్భంగా మంత్రి నారాయణ మాట్లాడారు.తెలంగాణకు వచ్చే ఆదాయంలో హైదరాబాద్ కీలక పాత్ర పోషిస్తోందని మంత్రి తెలిపారు. అదే విధంగా మహారాష్ట్రకు ముంబై, కర్ణాటకకు బెంగళూరు, తమిళనాడుకు చెన్నై ప్రధాన ఆదాయ వనరులుగా ఉన్నాయని చెప్పారు. ఆంధ్రప్రదేశ్కు కూడా ఆర్థిక రాజధానిగా అమరావతిని అభివృద్ధి చేయాలన్న ఉద్దేశంతో మాస్టర్ ప్లాన్ రూపొందించినట్లు తెలిపారు.
సింగపూర్ నుంచి మాస్టర్ ప్లాన్
అమరావతి ఆర్థిక రాజధాని నిర్మాణానికి సంబంధించిన మాస్టర్ ప్లాన్ను సింగపూర్ ప్రభుత్వం ఉచితంగా అందించిందని నారాయణ తెలిపారు. ఐకానిక్ భవనాల నిర్మాణం కోసం లండన్కు చెందిన నార్మన్ ఫోస్టర్ సంస్థను సంప్రదించినట్లు చెప్పారు.కృష్ణానది ఒడ్డున అమరావతిని నిర్మిస్తే రాష్ట్రంలోని అన్ని జిల్లాలకు సమన్యాయం జరుగుతుందని మంత్రి పేర్కొన్నారు. శ్రీకాకుళం నుంచి అనంతపురం వరకు అమరావతి మధ్యలో ఉంటుందని, రైలు, రోడ్డు మార్గాల ద్వారా మంచి అనుసంధానం ఉందని తెలిపారు.
58 రోజుల్లో 34 వేల ఎకరాలు
2015 జనవరిలో ల్యాండ్ పూలింగ్ నోటిఫికేషన్ ఇచ్చామని మంత్రి నారాయణ తెలిపారు. కేవలం 58 రోజుల్లో ఎలాంటి లిటిగేషన్ లేకుండా 34 వేల ఎకరాలను రైతులు రాజధాని నిర్మాణం కోసం ఇచ్చారని వివరించారు.అమరావతిలో పనులు ప్రారంభించడం, టెండర్లు పిలవడం తదితర ప్రక్రియలకు మూడున్నరేళ్లు పట్టిందన్నారు. మిగిలిన ఏడాదిన్నర కాలంలో అమరావతి కోసం రూ.10 వేల కోట్లు ఖర్చు చేసినట్లు తెలిపారు.
మూడు రాజధానుల పేరుతో పనులు నిలిపివేత
అయితే వైసీపీ అధికారంలోకి వచ్చిన తర్వాత మూడు రాజధానుల పేరుతో అమరావతి నిర్మాణాన్ని నిలిపివేసిందని మంత్రి నారాయణ విమర్శించారు. నిర్మాణ సంస్థల ఒప్పందాలను సక్రమంగా ముగించకుండా వదిలేయడంతో కూటమి ప్రభుత్వం అధికారంలోకి వచ్చిన తర్వాత వాటిని సాంకేతికంగా ముగించి మళ్లీ టెండర్లు పిలవాల్సి వచ్చిందని చెప్పారు.
గతంలో జరిగిన పనుల నాణ్యతను ఐఐటీ చెన్నై, ఐఐటీ హైదరాబాద్ నిపుణులతో పరీక్షించిన అనంతరం మళ్లీ నిర్మాణ పనులు ప్రారంభించామని తెలిపారు.
అండర్గ్రౌండ్ యుటిలిటీలతో సీడ్ యాక్సెస్ రోడ్
సీడ్ యాక్సెస్ రోడ్డుకు ఇరువైపులా విద్యుత్, గ్యాస్, టెలిఫోన్, నీటి సరఫరా వ్యవస్థలను భవిష్యత్తులో ఇబ్బందులు లేకుండా అండర్గ్రౌండ్లో ఏర్పాటు చేసేలా ప్రణాళిక రూపొందించామని మంత్రి నారాయణ వెల్లడించారు.
వైసీపీ అమరావతి రైతులను రెచ్చగొట్టేందుకు ప్రయత్నించినప్పటికీ.. రైతులు రాజధాని నిర్మాణానికి సహకరించారని తెలిపారు. అమరావతి నిర్మాణంలో భాగస్వామ్యం అయ్యే అవకాశం కల్పించినందుకు సీఎం చంద్రబాబుకు మంత్రి నారాయణ ధన్యవాదాలు తెలిపారు.
